सोलापूरचे प्रसिद्ध न्यूरोफिजिशियन डॉ. शिरीष वाळसंगकर यांचे आत्महत्येने निधन; वैद्यकीय क्षेत्रात शोककळा
सोलापूर, १९ एप्रिल २०२५ :
प्रसिद्ध न्यूरोफिजिशियन डॉ. शिरीष वाळसंगकर (वय ७०) यांनी शुक्रवारी रात्री आपल्या मोदी येथील निवासस्थानी आत्महत्या केली. रात्री सुमारे ८:३० वाजता जेवणाच्या वेळी कुटुंबासोबत असताना, अचानक ते बाथरूममध्ये गेले आणि तिथे स्वतःच्या पिस्तुलातून गोळी झाडून जीवन संपवलं.
त्यांचा मुलगा डॉ. अश्विन वाळसंगकर यांनी तत्काळ प्राथमिक उपचार केले, मात्र सर्व प्रयत्न निष्फळ ठरले आणि रात्री ९:३० वाजता त्यांचं निधन झालं. विशेष म्हणजे, त्यांचं निधन त्याच रुग्णालयात झालं, जिथे त्यांनी अनेक रुग्णांचे जीव वाचवले होते. पोलीस आयुक्त एम. राजकुमार यांनी घटनेची पुष्टी करत सांगितलं की, आत्महत्येच्या कारणांचा तपास सध्या सुरू आहे.
डॉ. वाळसंगकर हे सोलापूरचे पहिले न्यूरोलॉजिस्ट होते. त्यांनी सोलापूरमध्ये अत्याधुनिक न्यूरोलॉजी हॉस्पिटल सुरू करून या क्षेत्रात नवा अध्याय घडवला. त्यांच्या उल्लेखनीय सेवेबद्दल त्यांना महाराष्ट्राचे तत्कालीन मुख्यमंत्री देवेंद्र फडणवीस यांच्या हस्ते “बेस्ट न्यूरोलॉजिस्ट” पुरस्काराने सन्मानित करण्यात आले होते. ते केवळ सोलापूरपुरते मर्यादित नव्हते, तर महाराष्ट्र, कर्नाटक, आंध्र प्रदेश आणि तेलंगणामध्येही ते हेलिकॉप्टरने प्रवास करून रुग्णसेवा करत असत.
अलीकडेच त्यांनी निवृत्ती घेतली होती. त्यानंतर त्यांचं हे अचानक जाणं संपूर्ण शहराला हादरवून गेलं आहे. सहकारी, रुग्ण, आणि नागरिक आज त्यांना एक सेवाभावी, मनमिळावू डॉक्टर म्हणून आठवत आहेत, ज्यांनी सोलापूरमधील न्यूरोलॉजी सेवा बदलून टाकल्या.
प्रशासनाकडून सध्या त्यांच्या आत्महत्येच्या कारणांची चौकशी सुरू असून, आरोग्यविषयक अडचणी की वैयक्तिक संघर्ष हे कारण होते का, याचा शोध घेतला जात आहे.
About The Author
